GICA GODI – Literatura

Gica Godi s-aflã România ...bâneadzâ tu Americhii... Ducheashti armâneashti ashi turlii, câ atumtsea cându cântâ zborlu armânescu, oclji-nj-plângu. Mutrearea a lui tinjisitâ nj-adutsi aminti totna di nveastili armâni tu casâ nauâ. Ma boatsea a lui treamburâ...intrâ tu mâduâ... dishteaptâ dhorlu di bana a noastâ... di pâpânjlji a noshtsâ... di tuti atseali cari nu nâ armânu dicâtù tu minti...Tsi amârtii! Ma zborlu alù Gica Godi nâ asunâ ca unâ Câmbanâ: Câmbana a Europâljei! Cathi oarâ iu u ascultu, nu potu s-nji-ascundu lãcârnjili. Sh- cu câtu u ascultu ma multu, cu ahâtu mi minduescu câ zborlu yini di la Dumnidzã, sh-câ ma nâ-lù deadi, nu va s-nâ chearâ. Ti aiesta-lji portu multâ tinjii alù Gica, cari-lù voiù ashi cumù voiù tutâ armânamea.

S-nâ bâneadzâ shi s-nâ hârseascâ cu cânticlu sh-cu zboarâli a lui.
Vâ pitrecù ndauâ minduieri ali Kirâ ti Gica sh-vâ câlisescu tuts s-cântãmù deadunù
“Câmbana a Europâljei”.
Cu tinjii sh vreari armâneascâ, Niculachi Caracota _____________________________________________________________

Lu cunoscu Gica Godi di multsâ anji: eara studentu Bucureshti, la Facultatea di
Filologie. Mini earamu nica tu sculii shi, atumtsea, Gica Godi eara trâ mini ca unâ
urnechi di calea tsi vreamù s-u acatsù: s-mi ducù la idyea facultati.

Tu-atselji anji, Armânjiljii ditù România, dupu tsi-avea tricutâ tuti cripãrli shi fârmatsili a
colonidzariljei, a mutãrilorù di-aoa-aclo ditù chirolu a comunizmolui, avea ahurhitâ, pe-
anarga-anarga sâ s-toarnâ la adetsli, la cultura- a loru. Gica Godi eara tu-unâ parei di tiniri armânji – protlu bârnu di studentsâ tu fumeiljli-a lorù di Yrâmusteanji cipanji – shi
s-aduna tu ishita di stâmânâ s-treacâ deadunu… Noi, cama njitsljii, mutreamù cu
harauâ shi ciudii aestâ parei shi lomù urnechea di la elji: adrãmù pareia a noastâ armâneascâ.

Tuts agiumsimù studentsâ shi anjlji musheats di tinireatsâ furâ sumù semnulu a ducheariljei câ himù Armânji. Tinirlji di-atumtsea ca Gica Godi, Hrista Lupci i fratslji Câshiricâ ahurhirâ s-ducheascâ ghini câ nu-agiundzea s-n- adunãmù tu parei armâneascâ ahâtù chiro câtù nu va nâ turnãmù la fântâna a cânticlui shi-a gioclui armânescu. Gica Godi fu unù di protslji cari adrâ unâ orchestrâ armâneascâ… Nu-agârshiiù canâ di numtsâli la cari fuiù shi boatsea alù Gica Godi nji- adutsea unù iho di-alargu, mayicù, ditù lumea armâneascâ safi, alâsatâ shi-agârshitâ, aclo iu suntu locurli-a ljei vluyisiti di Dumnidzã!

Shi-ahurhimù s- agârshimù rock-lu, twist-lu, tangoulu shi gioclu shi cânticlu armânescu sh-dipunea mâyia tu suflitli-a noasti di tiniri cari, fârâ s- duchimù, nâ câftamù calea câtâ zârtsinâ, câtâ fara armâneascâ… Gica Godi cânta cântitsli veclji, ama avea ahurhitâ s-compunâ shi pi zboarâli-a lui… Multu amânatù anvitsaiù câ ahânti cântitsi cari li cântamù cu harauâ eara pi poeziili- a lui! Tsi mi fâtsea s-mi treacâ hiri- hiri eara boatsea a lui trimburatâ, chischinâ ca unâ câmbanâ tsi ti dishteaptâ ditù somnu! Mi hârsescu câ, dupu ahântsâ anji, boatsea-lji armasi ca a birbiljlui shi nâ dhurusi unù aleptu CD cu “Cântitsi armâneshtsâ, vol.1” inshitù New York tu anlu 2002. Pi-aestu CD s- avdi atselù ma musheatlu cânticù patrioticù armânescu, modernu – Câmbana a Europâljei. Tr-aestu cânticù amù anyrâpsitâ shi-altâ oarâ, ama minduiescu câ-lji si cadi unù dealihea studiu shtiintsificù.

Armânjlji au multu musheati cântitsi patriotitsi, mplini di dureari, traghismu – ashi cumù fu bana shi isturia a noastâ. Hirlu s-avea aruptâ di cama di 50 di anji di-aestâ adeti.

Pânâ cându Mihali Prefti nâ dhurusi cu “Dats cali!” shi Gica Godi cu “Câmbana a Europâljei”. Amù dzâsâ shi va s-xanadzâcù câ, dupu duchearea-a mea, Câmbana a
Europâljei easti imnulu natsionalù modernu a Armânjilorù! Anyisedzù s-lu-avdu cântatù di unâ mari orchestrâ sinfonicâ, di-unù mari corù di cântâtori, tu unâ salâ di contsertu…Ari tuti hãrli tr-aestâ tinjie tsi-lji si cadi! Poati va s-avemù tihi shi, unâ dzuâ, aestu yisù sâ s- facâ! Shtiu câ aestu cânticù va s- armânâ ti Gica Godi unù dealihea “violon d’Ingres” (lucru tsi s-fatsi mashi unâ oarâ!) ama shtiu câ ari tu minti s-ascoatâ shi-alti cântitsi patriotitsi. Unù di-aesti easti “Sarpâ mileti”, ncljinatù a prof. Vasili Barba.Omlu Gica Godi easti unâ dealihea paradiymâ di cumù lipseashti s-hibâ nvitsatsljii armânji di adzâ, dhurusits di mirâ shi cu harea a artilorù (cânticù, poezie): tinjisitù, mintimenù, durutù armânù, tapinù. Nu shtii tsi easti zilia! Daima azburashti di hãrli alântorù shi nu-ari arcatâ canâoarâ vârâ zborù urutù trâ vârâ…Cându-lji dzâshù minduierli a meali trâ aestu cânticu, lu vidzuiu ca andirsitù…Tr-atsea tu poematli-a lui zboarâli tsi-angreacâ nai ma multu suntu: Nâmuzea, Tinjia, Pistea,
Ihtibarea, Anamea, Grailu, Fara, Fumealjia…

Ligâtura mea cu Gica Godi easti shi cama-astreasâ câ himù shi soi: easti nipotu ali maia a mea. Nji-aducu aminti cându yinea la maia-a mea sh-nâ fâtseamù muabeti tu uborù… Deapoia, acâtsãmù doiljii calea a xinitiljei (elu bâneadzâ tora New York) shi nu nâ vidzumù-ndoi anji. Xanavidearea fu ma musheatâ cându vidzuiù câ Gica Godi agiumsi unù dealihea poetù! Amârtie câ, pânâ adzâ, nu-adunâ poematli-a lui tu unâ carti!

Avuiù haraua s-himù deadunù, tu veara 2003, Hrupishti shi Klisura, la Andamusea a Armânjilorù ditù Gârtsie.

Gica Godi adiljea, ti prota oarâ, tu locurli- a noasti armâneshtsâ! Teasi bratsâli câtù
putu, canda vrea s-adunâ la cheptu tutù Pindulu cu-a lui mushutets, shi duchiiù tsi minari s-fâtsea tu mintea shi inima-a lui! Duchi atumtsea, dealihea, marea crimâ tsi s-featsi cu armânamea, mutatâ, avinatâ, xinitipsitâ di locurli-a ljei. Mutrea pareili di giucâtori, stranjili tsi l-anyilicea shi videamù câ-lj plândzea suflitlu!

Cumù di-armasi nica tu banâ cânticlu, gioclu shi stranjlu armânescu? – mi- ntriba. Nu câfta apandisi di la mini ama eara njirarea a lui câ videa ca unù filmu tsi-lji si pârea ca yisâ! Ama cându vidzu câ limba armâneascâ chiru multu, s- dishtiptâ ditù mâyia a yislui cari n- arâdea! Shtiu câ aestâ cali tu Pindu alâsã torù ahânda tu bana-alù Gica Godi. Ti niagârsheari va s-armânâ dzua di Klisura cându, deadunù cu multsâ Armânji shi cu boatsea a birbiljilui a Pinduilui - Yioryi Maneca – cântãmù unâ dzuâ- ntreagâ. Gica Godi lâ cântã mash cântitsi patriotitsi shi duchimù câ zboarâli-a lui bâgã pi minduiari multsâ di-atselji tsi li- ascultarâ!Tu-aestâ musheatâ dzuâ di- amintari, tsi dhorù putemù sâ-lji fâtsemù alù Gica Godi? Minduiescu câ multsâ Armânji va s-hibâ sinfunji sâ-lji pitritsemù zboarâli a nai ma musheatlui cânticu patrioticu armânescu: Câmbana Europâljei.
Kira Mantsu.

Sursa: Bana Armaneasca

Lectura auxiliara: Bana Armaneasca, nr 1-2(39-40), 2005, pagina 25, jumatatea de pagina dedicata lui Gica Godi.